All'unnici di maju, 'nto sissanta,
tuccau a Petru Missu - chi piscava -
di pilutari "I Milli" pi Marsala:
(mimìu chi scantu !... quasi ci attisava !).

All'arba, a rima, trainava a occhiati:
sbucca d'u Faragghiuni, a trarimentu,
'n mezz'a faiddi e fumu, un gran vapuri;
l'omini... comu muschi, a centu a centu.

Cantavanu... D'u ponti, c'u mecafanu,
Unu 'n cammisa russa e 'na gran varva
mi fa: "Voi della barca... per Marsala ?”
“Prua a sciloccu, e chi Diu vi sarva !”

Mi vennu quasi a mmestiri:
“ 'Na cima, chi v'accumpagnu !...”
Genti d'ogni etati... Ribbelli pimuntisi !
Maria Virgini ! Parinu foddi !...
Allegri... Tutti armati...

Chiddi di Sapri (Botta e lu Nicòtera)
'nfussati aê ferri a Santa Catarina
cumprènninu c’arriva Garibardi...
vàsanu 'i carciareri e la catina.


Aurelio